Xeografía Física

Vista aérea de Rianxo

O Concello conta cunha extensión de 58,99 km² . As marxes Sur e Oeste son costeiras, con abundantes zonas de praia e outras rochosas e de cantís. Presenta dous grandes grupos montañosos entre os que discorre o amplo val do Río Te. Ó norte, os montes do Treito, cunha altura máxima de 678 m. no Pico Muralla, no extremo máis septentrional. Ó leste, entre as parroquias de Isorna, Leiro e Asados, os montes da Lioira (276 m.) e A Pena (218 m).

Clima

Tipo atlántico húmido, con invernos suaves e veráns frescos. Temperatura media máxima en xullo (21º) e mínima en xaneiro (9º). A temperatura no mar oscila entre os 12º e os 20º. Vexetación variada, predominando monte de pino e eucalipto, monte baixo de silva, xesta e toxo, e zonas de carballos, salgueiros, aveleiras e castiñeiros sobre todo preto dos ríos. Predominan os ventos do Suroeste, húmidos no inverno e secos no verán, e o Nordés, frío e seco. Rianxo presenta unha variedade hiperhúmida anque con tendencia a unha maior aridez estival, marca dunha transición climática cara ás Rías Baixas.